इस्लामावाद- मानव अधिकारवादी अन्तर्राष्ट्रिय संस्था एमनेस्टी इन्टरनेशनलले पाकिस्तानसमक्ष अफगान शरणार्थीहरुलाई देश निकाला नगर्न आग्रह गरेको छ ।

अफगानिस्ताको टोलो न्युजका अनुसार एमनेस्टी इन्टरनेशनलले एक विज्ञप्ति जारी गर्दै अफगान शरणार्थीहरुलाई देश निकाला र पक्राउ गर्ने कार्य तत्काल रोक्न आग्रह गरेको हो ।

अफगानिस्तानमा मानवीय संकट गहिरिँदै गएको अवस्थामा पाकिस्तानले शरणार्थीहरुलाई देश निकाला गर्न नहुने एमनेस्टीको भनाइ छ । अफगान शरणार्थीहरुको मानव अधिकारको सम्मान गर्नसमेत पाकिस्तानलाई एमनेस्टीले आग्रह गरेको छ ।

विज्ञप्तिमा देश निकालाका कारण अफगान महिला र बालिकाहरुको मानव अधिकारमा जोखिम उत्पन्न भएको जनाएको छ । ‘दशकौँदेखि पाकिस्तानमा अफगान शरणार्थीहरु बसोबास गरिरहेका छन् । पाकिस्तानको पछिल्लो निर्णयले उनीहरुलाई अफगानिस्तानमा खतरामा पार्नेछ ।’