काठमाडौं । बलिउड अभिनेता शाहरुख खान र उनकी छोरी सुहाना एउटै चलचित्रमा देखिने भएका छन् । यी बाबुछोरीले एक्सन थ्रिलर चलचित्र ‘किङ’ मा सँगै काम गर्ने भएका हुन् ।

चलचित्रमा पनि यी दुई बाबुछोरीकै भूमिकामा देखिने भएका छन् । बाबुछोरीको कथामा आधारित यस फिल्म रेड चिलिज र मार्फलिक्स इन्टरटेन्मेन्टले संयुक्त लगानीमा निर्माण गर्ने भएका छन् । रेड चिलिज शाहरुखको प्रडक्सन कम्पनी हो भने मार्फलिक्स इन्टरटेन्मेन्ट सिद्धार्थ आनन्दको हो ।

पठान चलचित्रमा काम गर्दा शाहरुख खानसँग नजिएका सिद्धार्थले किङमार्फत् सम्बन्ध अझ विस्तार गर्न लागेका हुन् ।

भारतीय मिडियाहरुका अनुसार यस फिल्मको निर्देशन सुजोय घोशले गर्ने भएका छन् । घोेश अहिले प्रि–प्रोडक्सनको काममा व्यस्त छन् । हाल स्क्रिप्टलाई अन्तिम रुप दिने तयारी छ । उनीहरु २०२४ को जनावरीदेखि सुटिङमा निस्कने तयारीमा रहेको भारतीय मिडियाले जनाएका छन् ।

सुहानको डेब्यू चलचित्र ‘द आर्चिज’ डिसेम्बर ७ मा नेटफिक्समा सार्वजनिक हुँदैछ । यसको अनुभवले पनि उनलाई किङमा काम गर्न सहज हुनेछ । फ्यानहरुले शाहरुखको सुहानासँग चलचित्र एक्सनभन्दा पारिवारिक बनोस् भन्ने अपेक्षा गरेका छन् ।

यसअघि शाहरुखले सन् २०१९मा ‘द लायन किङ’ मा जेठो छोरो आर्यनसँग पनि काम गरेका थिए । आर्यनले त्यस चलचित्रमा आवाज दिएका थिए । छोरासँगको सहकार्यले उनको चलचित्र प्रचारका पनि केही सहयोग भएको थियो ।