उदयपुर– उदयपुर जिल्लाको ऐतिहासिक एवम् पुरातात्विक महत्तो बोकेको उदयपुरगढीको पुननिर्माण तथा स्तरउन्नति भएसँगै उद्घाटन गरिएको छ । जिल्ला सदरमुकाम गाईघाटबाट करिव ३८ किलोमिटर पश्चिमा समुद्र सतहदेखि झण्डै १ हजार १६० मिटरको उचाइमा १५ रोपनि क्षेत्रफलमा फैलिएको ऐतिहासिक उदयपुरगढीको पुननिर्माण भएपछि गढीले पुरानो आकार लिएको छ ।  

तत्कालीन पञ्चवती गा.बि.स. मा पर्ने उदयपुरगढी दरवार हाल उदयपुरगढी गाउँपालिकामा पर्दछ । करिव तीनकरोड ५० लाख रुपैयाँ खर्चेर पुननिर्माण गरिएको सो पुरानो गढी दरवार आइतबार नेपाली सेनाका पूर्वी पृतना मुख्यालय इटहरीका प्रमुख उपरथी आसबहादुर तामाङ र उदयपुरगढी गाउँपालिकाका अध्यक्ष मानवबहादुर केप्छाकी मगरले संयुक्त रुपमा एक समारोहकाबीच उद्घाटन गरेका हुन् ।

कार्यक्रममा पञ्चकन्याबाट कलस यात्रा, नेपाली सेनाको ब्यान्डबाजा सहितको उच्च अधिकृतहरूको टोली, जनप्रतिनिधिहरू, राजनैतिक दलका कार्यकर्ता तथा महिला दिदीबहिनीहरूको भव्य रुपमा सहभागिता रहेको थियो ।

पुरानो गढीको वरिपरि एकसय ३० मिटर गोलो बंकर, बंकरको बीचमा पाँचसय मिटर व्यास सहितको गोलाकार अग्लो भागमा आठ त्रिभुज (अष्टकोण) आकारको गढीको निर्माण गरिएको छ ।

गढीको वरिपरि बाहिरपटि छ फीट र भित्रपटि १४ फीट उचाइको गारो लगाएर बंकर पुननिर्माण गरिएको छ । प्राचीन गढीे झल्काउने गरी काँचो ढुङ्गा चिल्लो र निश्चित आयाताकारमा ढालेर कलात्मक बनाएर जडान गरीएको छ ।