नयाँ दिल्ली– पछिल्लो समय पाकिस्तानबाट चालकरहित हवाई उपकरण ड्रोनमार्फत भारततर्फ लागूऔषधको तस्करी बढ्न थालेको पाइएको छ । हालै भारतीय सुरक्षा बलले भारतको पञ्जाब राज्यमा पाकिस्तानी सीमानजिकै ड्रोनबाट खसालिएको हेरोइन बरामद गरेको छ ।

पाकिस्तानी ड्रोनले झण्डै अढाई किलो लागूऔषध हेरोइन भारतीय भूमिमा खसालेको भारतीय समाचार संस्था एएनआईले जनाएको छ ।

पञ्जाब राज्यको त्रण तरण जिल्लामा भारतीय सुरक्षाकर्मीले पाकिस्तानी ड्रोनबाट खसालिएको हेरोइन बरामद गरेका हुन् । सीमा सुरक्षार्थ खटिएका भारतीय सुरक्षाकर्मीले हेरोइन खसालिरहेको ड्रोनको आवाज सुनेको र तत्काल खोजी अभियान सञ्चालन गरी उक्त परिमाणको लागूऔषध बरामद गरेको जनाइएको छ ।

खोजी अभियानका क्रममा कलासियन खुर्द गाउँको खेतमा २ किलो ३५० ग्राम हेरोइन बरामद गरेका थिए । पाकिस्तानबाट पछिल्लो समय ड्रोनको प्रयोग गरी भारततर्फ लागूऔषधको तस्करी बढ्दै गएको बताइन्छ । भारतीय सुरक्षाकर्मीले बेला बेला पाकिस्तानी भूमिबाट ड्रोनमार्फत भारततर्फ तस्करी गरिएका लागूऔषध बरामद गर्दै आएका छन् ।