काठमाडौँ – आईसीसी एकदिवसीय विश्वकप छनोटमा नेपाल वेस्ट इन्डिजसँग पराजित भएको छ । बिहीबार जिम्बावेको हरारेमा भएको खेलमा नेपाल वेस्टइन्डिजसँग १०१ रनले पराजित भएको हो ।

तीन सय ४० रनको लक्ष्यसहित जवाफी ब्याटिङमा उत्रिएको नेपाल ४९ ओभर ४ बलमा २३८ रनमा अलआउट भयो ।नेपालका लागि आरिफ शेखले अर्धशतक बनाए । उनले ९३ बलमा ६३ रन बनाए । त्यस्तै गुलशन झाले ४२, कप्तान रोहित पौडेलले ३० , आशिफ शेखले २८, दीपेन्द्रसिंह ऐरीले २३ रनको योगदान गरे । भने करण केसीले २७ रनमा २८ रनको योगदान गरे । त्यस्तै कुशल भुर्तेलले ५, भीम सार्कीले २, कुशल मल्लले २ रन बनाए ।

वेस्ट इन्डिजका लागि ज्यासन होल्डरले ३, अलजेरी जोशेफले दुई विकेट लिए ।

त्यसअघि जिम्बावेको हरारे स्पोट्र्स क्लबमा टस हारेर पहिले ब्याटिङ गरेको वेस्ट इन्डिजले निर्धारित ५० ओभरमा ७ विकेट गुमाउँदै तीन सय ३९ रनको योगफल बनायो । उसका लागि कप्तान शाई होप र निकोलस पुरनले सतक प्रहार गरे ।

कप्तान होपले सर्वाधिक एक सय ३२ रनको योगदान दिए । उनले एक सय २९ बल खेल्दै १० चौका र तीन छक्का प्रहार गर्दै एक सय ३२ रनको योगदान दिएका हुन ।

त्यस्तै निकोलस पुरनले एक सय १५ रन बनाए । उनले ९४ बलमा १० चौका र चार छक्कासहित एक सय १५ रनको योगफल बनाएका हुन् । चौथो विकेटका लागि पुरन र होपले दुई सय १६ रनको दोहोरो शतकीय साझेदारी गरेका थिए ।

ब्रेन्डन किङ्गले ३२ रन जोडे । उनले ४२ बल खेल्दै दुई चौका र दुई छक्काको मद्दतमा ३२ रन बनाएका हुन् । यस्तै रोभम्यान पावेलले २९ रन बनाए । उनले १४ बल खेल्दै तीन चौका र एक छक्का प्रहार गर्दै २९ रन बनाएका हुन् । वेस्ट इन्डिजका सुरुआती व्याट्सम्यान कायल मेयर्सलाई एक रनमा आउट भए भने जासोन होल्डरले अविजित १६ रन बनाए ।

बलिङतर्फ नेपालका ललित राजबंशीले तीन विकेट लिए भने करण केसी, गुलशन झा, सन्दिप लामिछाने र दीपेन्द्रसिह एरीले समान एक(एक विकेट लिए । नेपाललाई उक्त प्रतियोगिताको सुपर सिक्समा पुग्नको लागि वेस्ट इन्डिजविरुद्धको खेल जित्नै पर्ने दबाब रहेको छ ।

यसअघि भएको पहिलो खेलमा नेपाल जिम्बावेसँग आठ विकेटले पराजित भएको थियो भने दोस्रो खेलमा नेपालले अमेरिकालाई छ विकेटले हराएको थियो । नेपालले अब नेदरल्याण्ड्सविरुद्ध खेल्ने छ ।