काठमाडौँ– राष्ट्रिय एकता अभियानले आफ्ना नेता मनिष पुर्वेमाथि अज्ञात समुहले आक्रमण गरेको जनाएको छ । 

आइतबार राति बर्दिबासबाट जनकपुर जाने क्रममा पुर्वेमाथि सांघातिक आक्रमण भएको अभियानले जनाएको हो । उनलाई करिब ८ बजे गुडिरहेको सार्वजनिक गाडीमा चार जनाको अज्ञात समूहले विसालु ग्याँस सुँघाएर बेहोस बनाई नियन्त्रणमा लिएको थियो । उनलाई निर्मम कुटपिट गरी मरणासन्न अवस्थामा नजिकैको खोलामा फ्याँकेको अवस्थामा पाइएको छ ।

होसमा आउँदा आफू खोला किनारमा भएको पुर्वेले बताएका छन् । उनलाई उपचारका लागि जनकपुरस्थित प्रादेशिक अस्पतालमा भर्ना गरिएको छ । पुर्वेको टाउको, खुट्टा र शरीरका विभिन्न भागमा चोट लागेको छ ।

अभियानका राष्ट्रिय अध्यक्ष विनय यादवले सोमबार विज्ञप्ति जारी गर्दै हिन्दू समाजको सेवामा आफूलाई समर्पित गरेका व्यक्तिमाथिको आक्रमण निर्लज्जताको पराकाष्ठा भएको बताएका छन् । 

उनले स्तब्ध पार्ने यस घटनाको गहिरो र निष्पक्ष छानबिन गर्न सुरक्षा निकायसँग माग गरेका छन् ।