काठमाडौँ– संयुक्त अरब इमिरेट्स (युएई) को भ्रमणमा रहेका संघीय संसद्‌, राष्ट्रिय सभाका अध्यक्ष गणेशप्रसाद तिमिल्सिना र युएईको संघीय राष्ट्रिय काउन्सिलका सभामुख सक्र घोबासबीच अबुधाबीस्थित काउन्सिलमा शिष्टाचार भेटघाट भएको छ।

उक्त भेटघाटमा अध्यक्ष तिमिल्सिना र सभामुख घोबासले दुई देशबीचको द्विपक्षीय सम्बन्धका विविध आयामहरूमा छलफल गरेका थिए । बैठकमा उनीहरूले नेपालीहरूको एक प्रमुख रोजगार गन्तव्यका रूपमा युएइ रहेकाले यसलाई थप व्यवस्थित गरी पारस्परिक हितमा हुने गरी सहकार्य गर्नुपर्नेमा जोड दिएका थिए । 

बैठकमा अध्यक्ष तिमिल्सिनाले युएईमा नेपालीहरूले आर्जन गरेको सीपलाई नेपालमा पनि प्रयोग गरी देशको विकासमा योगदान पुर्याउने सम्भावना रहेको बताए। उनीले युएईमा काम गर्ने नेपालीहरूको हकहित तथा सुरक्षा अभिवृद्धि गर्ने सम्बन्धमा पनि दुई देशबीच भैरहेको सहकार्यलाई थप सुदृढ गर्नुपर्ने बताए ।

दुई देशबीच रोजगारीका अलावा लगानी, वैदेशिक सहयोग र जनस्तरको सम्बन्धलाई थप सुमधुर बनाउनुपर्नेमा उनको जोड थियो । नेपाल सरकारले विदेशी लगानीलाई उच्च प्राथमिकता दिएको उल्लेख गर्दै उनले युएईका ठूला लगानीकर्ताहरूलाई नेपालको पर्यटन, जलविद्युत्, चिकित्सा शिक्षा, पूर्वाधार र सेवा लगायतका क्षेत्रमा लगानी गर्न आग्रह गरेका छन् ।

भेटमा सभामुख घोबासले युएईमा रोजगार गरिरहेका नेपाली नागरिकले युएईको विकासमा पुर्याएको योगदानको प्रशंसा गरेका थिए । उक्त भेटघाटमा नेपालको तर्फबाट मुस्लिम आयोगका अध्यक्ष समिम मियाँ अन्सारी, युएईका लागि नेपाली राजदूत कृष्णप्रसाद ढकाल तथा युएईका तर्फबाट उक्त काउन्सिलका उच्च अधिकारीहरूको समेत सहभागिता रहेको थियो।