काठमाडौँ- नेपाली कांग्रेसको शेखर कोइराला पक्षको भेलाले सरकारलाई विश्वासको मत दिनु गलत भएको निष्कर्ष निकालेको छ ।

आइतबार काठमाडौंमा बसेको भेलाले सरकारलाई विश्वासको मत दिएर कांग्रेसले गल्ती गरेको र अब सदनमा सशक्त प्रतिपक्षको भूमिका खेल्नुपर्ने निष्कर्ष निकालेको हो । सरकारलाई विश्वासको मत दिएपछि अब स्पष्ट रुपमा पार्टीले प्रतिपक्षीको भूमिका निर्वाह गर्नुपर्नेमा अधिकांशको जोड रहेको कांग्रेस केन्द्रिय सदस्य चन्द्र भण्डारीले बताए ।

यसअघि गठबन्धन गरेर नै निर्वाचनमा गएको कांग्रेस ठूलो पार्टी हुँदा पनि सरकार बन्ने बेला गठबन्धन टुट्नु कमजोरी भएको उनको भनाइ छ । उनले कांग्रेस प्रतिपक्षीमा बस्ने वा राष्ट्रपति पाउँछु भनेर दौडने भन्ने विषयमा बैठकमा छलफल भएको जानकारी दिए ।

आफुहरुको छलफल कसैप्रति लक्षित नभइ र पार्टीलाई बलियो बनाएर अघि बढाउनका लागि भएकाले आगामी संसदको बैठक र केन्द्रीय कार्यसमिति बैठक अघि ठोस निष्कर्ष निकाल्ने भण्डारीले बताए ।