काठमाडौं – नेपाल सुपर लिग (एनएसएल)मा बीरगञ्ज युनाईटेडले काठमाडौं रेजर्सलाई ४–१ गोल अन्तरले हराएको छ ।

सनसनीपूर्ण जित निकालेको बिरगञ्जले प्लेअफको गणितिय सम्भावनालाई पनि कायम राखेको छ । विलियम ओपोकुको ह्याट्रिकको सहयोगमा बिरगञ्जले प्रतियोगिताकै फराकिलो अन्तरको जित निकाल्यो ।

बीरगञ्जसँगको हारले काठमाडौंको प्लेअफ सम्भावना कठिन बनेको छ । काठमाडौंलाई प्लेअफमा छनोट हुन अब आफ्नो नतिजाले मात्र पुग्ने छैन, अरु खेलको नतिजामा समेत भर पर्नुपर्नेछ ।

खेलमा अग्रता भने काठमाडौंले जुनियर एन्कुन्गेको गोलमा लिएको थियो । लगत्तै काठमाडौंले पेनाल्टीको अवसर पाएको थियो । डिबक्सभित्र मार्की खेलाडी हिसब थपलियालाई फल गरेपछि काठमाडौंले अग्रतालाई दोब्बर बनाउने अवसर पाएको थियो । तर बिरगञ्जका गोलकिपर तथा कप्तान दीप कार्कीले पेनाल्टीलाई रोके ।

पहिलो हाफको इन्जुरी समयमा विलियम ओपोकुको पेनाल्टी गोलमा बीरगञ्जले खेल बराबरी गरेको थियो । दोस्रो हाफमा भने बिरगञ्ज पूर्णत हाबी रह्यो । उसले काठमाडौंको पोस्टमा सुरुवातमै थप तीन गोल गर्यो ।

दोस्रो हाफ सुरु भएको पहिलो मिनेटमै सुनिल खड्काले गोल गर्दै बीरगञ्जलाई २–१ को अवस्थामा पुर्याएका थिए । त्यसपछि विलियमले ५५ औं मिनेटमा बीरगञ्जका लागि तेस्रो गोल गरे । त्यसको दुई मिनेटपछिनै विलियमले आफ्नो ह्याट्रिक पुरा गर्दै बिरगञ्जलाई ४–१ को जित दिलाए ।

जित सहित बीरगञ्ज ७ खेलबाट ८ अंक जोड्दै तालिकाको छैटौं स्थानमा उक्लिएको छ । काठमाडौं ९ अंक सहित पाँचौं स्थानमा यथावत छ ।