काठमाडौं- राज्यलाई झण्डै ३ खर्ब रुपैयाँ हानि नोक्सानी पुर्‍याउने नियतले एनसेल घोटाला प्रकरणमा भएको चलखेललाई राज्यविरुद्धको अपराध भन्दै मानवअधिकार तथा शान्ति समाजले काठमाडौंको माइतीघरमा प्रदर्शन गरेको छ ।

एनसेल प्रकरणमा वर्तमान प्रधानमन्त्री, पूर्वप्रधानमन्त्रीहरुसहित राजनीतिज्ञहरुको संलग्नता रहेको भन्दै समाजले प्रदर्शन गरेको हो । प्रचलित कानुनअनुसार सरकारको स्वामित्वमा आउने सम्पत्ति केही व्यक्ति र गिरोहको कब्जामा पार्ने चलखेल भइरहेको समाजले जनाएको छ ।

त्यसैगरी, समाजले राज्यका विभिन्न निकायका पदाधिकारीहरु सन्देहको घेरामा रहेको हुँदा विश्वसनीय न्यायिक छानबिन आयोग गठन गर्न, राज्यको स्वामित्वमा आउनुपर्ने सम्पत्ति राज्यलाई नै हस्तान्तरण गर्न, राज्यलाई ठूलो हानिबाट जोगाउन र एनसेल प्रकरणमा संलग्नलाई दण्डित गर्न माग गरेको छ ।

प्रदर्शनमा सहभागीले एनसेल प्रकरणमा संलग्न प्रधानमन्त्री–पूर्वप्रधानमन्त्रीलाई कारबाही गर, प्रधानमन्त्री दाहाल र पूर्वप्रधानमन्त्री देउवाको संदिग्घ सिंगापुर भ्रमणमा भएका ‘डिल’ बारे छानबिन हुनुपर्छ, शीर्ष नेता मिलेका ः खरब–खरब निलेका, देशलाई तीन खर्ब हानि पुर्याउने चलखेल राज्यविरुद्धको अपराध होजस्ता नारा लेखिएका प्लेकार्ड प्रदर्शन गरेका थिए ।

प्रदर्शन गर्ने १७ जना गिरफ्तार

प्रदर्शनमा सहभागी शान्ति समाजका संस्थापक सभापति कृष्ण पहाडी, सभापति रामकृष्ण बराल, सल्लाहकारहरु उत्तम पुडासैनी र गोविन्द खनाल, संस्थापक सदस्य कृष्ण कँडेल, महासचिव रेनुका पौडेल, सचिवहरु रामप्रसाद जोशी र चन्द्रमणि बञ्जारा, कोषाध्यक्ष किरण ढकाल, केन्द्रीय सदस्यहरु नम्रता खरेल र दिवाकर पुडासैनी, अधिकारकर्मीहरु बलबहादुर गाहा मगरसहित १७ जनालाई प्रहरीले गिरफ्तार गरेको छ । उनीहरुलाई पुलिस क्लब भृकुटीमण्डपमा राखिएको समाजले जनाएको छ । एनसेल महाघोटाला प्रकरणविरुद्ध निरन्तर नागरिक निगरानी र खबरदारीस्वरुप समाजले आन्दोलन सुरु गरेको जनाएको छ ।