काठमाडौँ- प्रतिनिधिसभाकी उपसभामुख इन्दिरा राना मगरले नेकपा एमालेका सांसद दयालबहादुर शाहीले बोलेका शब्द हटाउन निर्देशन दिएकी छिन् । आइतबार बसेको संसद् बैठकका क्रममा सांसद शाहीले अमर्यादित शब्द प्रयोग गरेको भन्दै सांसदहरुले आपत्ति जनाएपछि बोलेका शब्द हटाउन निर्देशन दिइएको हो ।

सम्बोधनका क्रममा उनले नेपाली कांग्रेसका गगन थापा, विश्वप्रकाश शर्मा, बर्दी पाण्डेहरुले सत्ता स्वार्थका लागि बीपीको सिद्धान्तलाई छाडेको टिप्पणी गरेका थिए । उनले कांग्रेसका नेताहरु प्रधानमन्त्री पुष्पकमल दाहाल प्रचण्डको पुच्छर बनेको आरोप लगाएका थिए । उनले उनीहरुले ‘गहतको झोलमा जात फालेको’ समेत टिप्पणी गरे ।

त्यसपछि कांग्रेस सांसद ईश्वरी न्यौपानेले आपत्ति जनाएकी थिइन् । उनले सभामुखमार्फत् सांसदको नाम लिइनुपर्ने भएपनि सांसद शाहीले सीधै सांसदहरुको नाम लिएको भन्दै आपत्ति जनाएकी थिइन् ।

‘हामी संशोधनमा बोलिरहेका छौँ कि व्यक्ति–व्यक्ति, पार्टी–पर्टीका विषयमा बोलिरहेका छौँ ? उहाँले बोलेका शब्दहरु रेडकबाट हटाइयोस्’ उनले भनिन् ।

त्यसपछि प्रतिनिधिसभाको अध्यक्षता गरिरहेकी राना मगरले सांसद शाहीले बोलेका शब्दहरु रेकर्डबाट हटाउन निर्देशन दिइन् ।