काठमाडौँ- भारत र क्यानाडा द्विपक्षीय हितका क्षेत्रमा जारी सहकार्यलाई थप सुदृढ गर्न सहमत भएका छन् । भारतीय विदेश मन्त्रालयका अनुसार भारत र क्यानाडाबीच व्यापारिक सम्बन्ध, ऊर्जा, शिक्षा, प्रतिआतंकवादलगायतका क्षेत्रमा सहकार्यलाई थप सुदृढ गर्न सहमत भएका हुन् ।

केही समयअघि भारतका विदेश सचिव सौभर कुमार र क्यानाडाका डेभिड मोरिसनबीच क्यानाडाको ओटावामा भेटवार्ता भएको थियो ।

उक्त भेटवार्तामा दुई मुलुकका प्रतिनिधिबीच हिन्द प्रशान्त क्षेत्रमा विकसित घटनाक्रम तथा बहुपक्षीय संगठनमा सहकार्यका विषयमा छलफल भएको भारतीय समाचार संस्था एएनआईले जनाएको छ ।

भारतले जी २० को अध्यक्षता गरिरहेको सन्दर्भमा क्यानाडेली पक्षले जी २० लाई सफल बनाउन भारतसँग सहकार्य गर्ने समेत जनाएको छ ।

यसअघि गत फेब्रुअरी महिनामा क्यानाडाकी विदेशमन्त्री मेलिन जोलीले भारतको भ्रमण गरी भारतीय समकक्षी एज जयशंकरसँग भेटवार्ता गरेकी थिइन् ।