काठमाडौँ- विशेष अदालतबाट भएको फैसला चित्त नबुझेको भन्दै अख्तियार दुरुपयोग अनुसन्धान आयोगले सर्वोच्च अदालतमा पुनरावेदन दिएको छ ।

प्रवक्ता भोला दाहालले विज्ञप्ति जारी गर्दै अख्तियारले विशेष अदालतले विभिन्न मितिमा गरेका फैसलामध्ये सार्वजनिक सम्पत्ति हानी नोक्सानी गरी भ्रष्टाचार गरेकोसम्बन्धी दुई वटा मुद्दा सर्वोच्च अदालतमा पुनरावेदन गरेको जनाएका हुन् ।

शहीद स्मृति सामुदायिक वन उपभोक्ता समूहका अध्यक्ष प्रतिवादी कर्णबहादुर विष्टले ट्याक्टर खरिदबापत १२ लाख ९० हजार रुपैयाँ भ्रष्टाचार गरेको आरोप लागेको छ ।

यसबारे विशेष अदालतले २०७९ साल चैत २८ गते फैसला गर्दै प्रतिवादी विष्टलाई २ वर्ष ६ महिना कैद र कसूर कायम भएको बिगो बमोजिमको रकम ११ लाख ४१ हजार ७४ रुपैयाँ जरिवाना तथा नोक्सानीको बिगो निज प्रतिवादीबाट असुल उपर हुने ठहरी फैसला भएको थियो । रकम हिनामिना गरी भ्रष्टाचार गरेको आरोपमा नवराज जोशीसहितको सो मुद्दा पुनरावेदन गरिएको आयोगले जनाएको छ ।

यस्तै, झुट्टा ब्यहोराको गलत प्रतिवेदन दिई सात लाख ८४ हजार ४४६ रुपैयाँ सरकारी रकम हिनामिना गरी भ्रष्टाचार गरेको आरोपमा प्रतिवादी छेवाङ लामा, बोधनाथ उप्रेती र निर्मल लामा स्याङ्तानसहित तीन जनाविरुद्धको मुद्दा सर्वोच्चमा पुनरावेदन गरिएको आयोगले जनाएको छ ।