काठमाडौं – एकदिवसी विश्वकप २०२३ सकियो । भारतमा आयोजना भएको यो विश्वकपमा आयोजकलाई हराउँदै अस्ट्रेलियाले कीर्तिमानी छैटौं पटक उपाधि जित्यो ।

क्रिकेट पे्रमिहरुका लागि अब सन् २०२७ मा हुने विश्वकपका बारेमा चासो लाग्न सक्छ । आउँदो एकदिवसीय विश्वकप अहिलेको भन्दा केही फरक शैलीमा आयोजना हुनेछ ।

यो विश्वकपमा १० राष्ट्रले मात्र सहभागीता जनाएका थिए । तर, आउँदो विश्वकपमा १४ राष्ट्रले खेल्नेछन् । दक्षिण अफ्रिका, जिम्बावे र नामिबिया तीन राष्ट्रले आयोजना गर्न लागेको यो विश्वकपमा नामिबिया आयोजकको रुपमा डेब्यू गर्नेछ । दक्षिण अफ्रिका र जिम्बावेले भने सन् २००३ को विश्वकप आयोजना गरेका थिए ।

आउँदो विश्वकपमा दक्षिण अफ्रिका र जिम्बावे आयोजकका हैसियतमा विश्वकप खेल्ने पक्का भएपनि नामिबिया विश्वकप खेल्ने निश्चित भइसकेको छैन् । आईसीसीको एसोसिएट राष्ट्र भएका कारण नामिबिया आयोजकका हैसियतामा छनोट हुने नहुने अहिले नै निश्चित भएको छैन् । नामिबियाले विश्वकप छनोट प्रकृया पार गरेपछि मात्रै खेल्न पाउने छ अन्यथा आयोजक भएपनि नामिबिया विश्वकप बाहिर रहनसक्नेछ ।

आउँदो विश्वकपमा आयोजकको हैसियतले २ राष्ट्र छनोट हुँदा आईसीसीको शीर्ष वरियतामा रहने ८ राष्ट्र पनि स्वतः छनोट हुनेछन् । बाँकी ४ राष्ट्रले विश्वकप छनोटका विभिन्न चरण पार गरेपछि मात्रै विश्वकपमा सहभागिता जनाउन पाउनेछन् ।