काठमाडौँ–नेकपा एकीकृत समाजवादीको पोलिटब्युरो बैठक बसिरहेको छ। पार्टीको केन्द्रीय कार्यालय आलोकनगरमा जारी बैठकमा वर्तमान राष्ट्रिय परिस्थितिबारे छलफल भइरहेको छ ।

भोलिसम्म चल्ने बैठकमा संगठन सुदृढीकरणको रिपोर्टिङ, पार्टीका सैद्धान्तिक तथा वैचारिक सवाल र पार्टीको संगठनात्मक अवस्थाबारे छलफल हुने बताइएको छ । त्यस्तै पार्टीमा देखा परेको आन्तरिक समस्या र आगामी कार्ययोजना पनि बैठकको कार्यसूचीमा रूपमा रहेका छन्।

बैठकमा पार्टीले अवलम्बन गर्ने वैचारिक दृष्टिकोण, जनताको बहुदलीय जनवादको सान्दर्भिकता, पार्टीको संरचना र सामर्थ्य  विस्तारका लागि आवश्यक रणनीति, सङ्गठन विस्तार तथा पार्टी आधारभूत तहसम्म स्थापित गर्न आवश्यक कार्ययोजना, समसामयिक परिस्थिति र राजनीतिक प्रतिवेदनलगायत विविध विषयमा छलफल हुने पार्टी महासचिव घनश्याम भुसालले जानकारी दिए ।

बैठकमा धारणा राख्ने पोलिट्ब्युरो सदस्यलाई नेतृत्वलाई रचनात्मक सुझाव दिन पनि भनिएको  छ।

पार्टीको असार २९ देखि साउन ५ गतेसम्म चलेको सचिवालय बैठकले पार्टीको राजनीतिक कार्यदिशाका रूपमा जनताको बहुदलीय जनवादको सान्दर्भिकता रहेको र यसलाई समाजवादी आन्दोलनको रूपमा विकास गर्नुपर्ने निष्कर्ष निकालेको थियो।