काठमाडौं– साउदी अरब पठाइदिन्छु भन्दै ठगी गर्ने मेनपावरका सञ्चालकसहित दुई जना पक्राउ परेका छन् ।

पक्राउ पर्नेमा नवलपरासी स्थायी घर भएका ४२ वर्षीय लक्ष्मण विश्वा र काभ्रेपलाञ्चोक स्थायी घर भएकी  ४० वर्षीया सोफी मल्ल रहेका छन् ।

काठमाडौंकाे पुरानो बानेश्वरमा अवस्थित ओसो रिक्रुटिङ मेनपावरका संचालक लक्ष्मण विश्वा समेत दुई जनाले ओम बाबु साहलाई वैदेशिक रोजगारीको लागि साउदी अरब पठाइदिन्छु त्यसको लागि  एक लाख २५ हजार रुपैयाँ लाग्छ र साउदी अरब पुगेपछि प्रतिष्ठित कम्पनीमा काम लगाइदिन्छु, जहाँ मासिक ४० हजार रुपैयाँ तलब हुन्छ भनी विश्वास दिलाई एक लाख २५ हजार रुपैयाँ लिई सम्पर्क विहीन भई ठगी गरेकोले काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले खोजतलास गर्ने क्रममा दुबैलाई मंसिर २२ गते पक्राउ गरेको हो ।

उनीहरूलाई थप अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको  प्रहरीले जनाएको छ ।