काठमाडौँ– प्रधानमन्त्री पुष्पकमल दाहाल ‘प्रचण्ड’ ले एनसेल शेयर बिक्री प्रक्रिया सहज र स्वाभाविक नदेखिएकाले नै छानविन प्रक्रिया अघि बढाइएका बताएका छन् ।

सिंहदरबारमा मंगलबार बसेको प्रतिनिधिसभा अन्तर्गतको राज्य व्यवस्था तथा सुशासन समितिको बैठकमा प्रधानमन्त्री प्रचण्डले एनसेलले प्रकरण मुुलुकको हित विपरित देखिएको र शेयर बिक्री प्रक्रिया सहज र स्वाभाविक नदेखिएकाले नै छानविन प्रक्रिया अघि बढाइएको बताएका हुन् ।

प्रधानमन्त्री प्रचण्डले एनसेल शेयर बिक्री प्रक्रियाका क्रममा विदेशमा खडा गरिएको कम्पनीको मालिकलाई आफू लगायत शेर बहादुर देउवा र केपी ओलीले समेत चिनेको भन्दै व्यक्तिगत सम्बन्ध भएकै कारण कसैलाई छुट नहुने  स्पष्ट पारेका छन् ।

उनले एनसेल प्रकरणमा कतै कसैबाट कानुन विपरीतका काम कारबाही भए गरेको पाइएमा कानुनबमोजिम हदैसम्मको कारबाही गर्न सरकार प्रतिबद्ध रहेकोबारे जानकारी गराएका छन् ।

नेपालको राजस्व, लगानी र दूरसञ्चारको विकासमा पर्ने पार्ने प्रभावका बारेमा गहन र विस्तृत अध्ययन तथा छानबिन गर्नुपर्ने आवश्यकता महसुस गरी पूर्वमहालेखापरीक्षक टङ्कमणि शर्मा दङ्गालको संयोजकत्वमा पाँच सदस्यीय अध्ययन तथा छानबिन समिति गठन गरेको उनले बताए ।

उनले सुशासन, समृद्धिको पक्षमा आफ्नो प्रतिवद्धता अनुसार काम गर्न नपाएको र अझै भ्रष्टाचारमाथि निर्मम भएर काम गर्न इच्छा भएको जिकिर गरे । प्रधानमन्त्री प्रचण्डले आफू पछिल्लो पटक प्रधानमन्त्री भएको १ वर्ष भएको र राष्ट्रको नाममा सम्बोधन गर्ने तयारीमा रहेको बताए ।