काठमाडौँ- दक्षिण एसिया अन्तर्राष्ट्रिय पुस्तक प्रर्दशनी आगामी मंगलबारदेखि सुरु हुने भएको छ । नेपाल पुस्तक तथा स्टेशनरी व्यवसायी महासंघले आइतबार काठमाडौंमा पत्रकार सम्मेलन गर्दै मंसिर ५ देखि ९ गते सम्म काठमाडौंको भृकुटीमण्डपमा प्रदर्शनीको आयोजना गर्न लागिएको जानकारी दिएको हो ।

प्रधानमन्त्री पुष्पकमल दाहाल प्रचण्डले उद्घाटन गर्ने प्रदर्शनीमा दक्षिण एसियासहित चीन, अमेरिकालगायत १५ भन्दा धेरै देशका प्रकाशक, उत्पादक तथा वितरकहरुको सहभागिता रहने संघका महासचिव शिवसागर शर्माले जानकारी दिए । प्रदर्शनीको १५ लाखले अवलोकन गर्ने अपेक्षा रहेको उनले बताए ।

महोत्सवले दक्षिण एसियाली राष्ट्रहरूबीच शिक्षा, साहित्य, संस्कृति र सञ्चार आदानप्रदानको माध्यमबाट समेत आपसी सम्बन्ध प्रगाढ बनाउनमा महत्वपूर्ण भूमिका खेल्ने आयोजकको विश्वास छ ।