काठमाडौँ- एकदिवसीय विश्वकप क्रिकेटको फाइनलमा भारतलाई पावरप्ले मै झट्का लागेको छ । अहमदावादमा टस हारेर पहिले ब्याटिङ गरेको भारतले सुरुवाती १० ओभरमा दुई विकेट गुमाएको थियाे ।

ओपनर ब्याटर दुबै गुमाएको भारतले १० ओभरमा २ विकेट गुमाएर ८० रन बनायो । उसका लागि कप्तान तथा ओपनर ब्याटर रोहित शर्मा ४७ रन बनाएर आउट भए । ३१ बलको सामना गरेका उनले ४ चौका र ३ छक्का प्रहार गरे ।

भारतलाई आक्रामक सुरुवात दिलाएका उनी ग्लेन म्याक्सवेलको बलमा छक्का हान्न खोज्दा ट्रेभिस हेडको हातबाट क्याचआउट भए । सुरुमै आउट भएका अर्का ओपनर शुभमान गिल ४ रनमै आउट भए भने चौथो नम्बरमा आएका भरपर्दा भनिएका श्रेयस अय्यर पनि ४ रनमै आउट भए ।

यो समाचार तयार पार्दासम्म भारतले १५ ओभरमा ३ विकेट गुमाएर ९७ रन बनाएको छ । क्रिजमा कीर्तिमानी ब्याटर विराट कोहली र यसअघि अष्ट्रेलियासँगको खेलमा ९७ रन बनाएका केएल राहुल छन् ।

अष्ट्रेलियाका लागि प्याट कुमिन्स, मिचेल स्टार्क र ग्लेन म्याक्सवेलले एक–एक विकेट लिएका छन् । भारत न्युजिल्याण्डलाई हराउँदै फाइनल पुगेको हो भने दोस्रो सेमिफाइनलमा अष्ट्रेलियाले दक्षिण अफ्रिकालाई हराएको थियो ।