काठमाडौँ– एसीसी यू–१९ प्रिमियर कप क्रिकेटमा नेपालले साउदी अरबसामु ३ सय ४८ रनको लक्ष्य प्रस्तुत गरेको छ । 

मलेसियाको बान्गीमा जारी खेलमा टस जितेर साउदी अरेबियाले फिल्डिङ रोजेपछि ब्याटिङमा उत्रिएको नेपालले निर्धारित ५० ओभरमा ७ विकेटको क्षतिमा ३ सय ४७ रन बनायो । 

नेपालका अर्जुन कुमालको १ सय ४२ रनको शतकीय पारी खेले भने आकाश त्रिपाठीले ८९ रनको योगदान गरे । यस्तै, दीपक बोहराले २९, विशाल विक्रम केसीले २४ तथा दीपकप्रसाद डुम्रे र दीपेश कँडेलले १४–१४ रन बनाए ।

साउदीका मुहमद अमद राजा र मुहमद अहमदले दुई-दुई तथा अब्दुल्लाह सिराज, जुहिर मुहमद र सजिव मुजिवुर रहमानले एक–एक विकेट लिए ।

जारी प्रतियोगिताको समूह ‘ए’ मा रहेको नेपाल र साउदी अपराजित छन् । यस खेलको विजेता सेमिफाइनल पुग्ने भएकाले दुवै टोली दबाबमा छन् ।

समूह ‘ए’ मा रहेका नेपाल र साउदी दुवैले यसअघि इरान र बहराइनलाई हराउँदै दुईदुई खेल जितिसकेका छन् । दुई खेलबाट समान ४ अंक भए पनि नेट रन रेटका आधारमा नेपाल शीर्षस्थानमा छ भने साउदी दोस्रो स्थानमा छ ।

१६ टोली सहभागी प्रतियोगिताको उत्कृष्ट तीन टोली एसीसी एसिया कपमा स्थान बनाउनेछ ।