काठमाडौँ- राजधानीको दरबारमार्गस्थित पेभेलियन हलमा आयोजित ‘एड्रेसिङ सिस्टम इन नेपाल, स्ट्यान्डर्डाइजिङ मेथड्स, ब्रिजिङ ग्याप्स एण्ड एक्सप्लोरिङ अपर्चुनिटिज’ विषयक अन्तरक्रिया कार्यक्रम सम्पन्न भएको छ ।

कार्यक्रममा बोल्ने सरोकारवालाहरुले डिजिटल प्रविधिबाट नक्साङ्कन गर्दा प्रयोगकर्ता एवम् आम सर्वसाधारणलाई सहज हुनेगरी गर्नुपर्नेमा सरोकारवालाहरुले जोड दिएका छन् ।

कार्यक्रममा बोल्दै ओपन स्ट्रिट म्यापका भूगोलविद् आइभान गेटिङले डिजिटल प्रविधिबाट ठेगाना निर्धारण गर्ने प्रणालीलाई अझ सुधार गर्नुपर्ने बताए । कार्यक्रममा उनले नक्साङ्कनका माध्यमबाट आम सर्वसाधारणमा मानवीय सुविधाको पहुँच पुर्‍याउन सहज हुने धारणा राखे ।

त्यसैगरी, कार्यक्रममा सहभागी हुलाक सेवा विभागका प्रतिनिधि दयानिधि लोहनीले हुलाक सेवाले पछिल्लो समय गुगलको प्लस कोड प्रयोग गर्दै आएको जानकारी दिए ।

कार्यक्रममा इन्जिनियर, विभिन्न स्टार्टअप कम्पनीका प्रतिनिधिहरु, स्थानीय तहका प्रतिनिधिहरु, नक्साङ्कनसम्बद्ध सरोकारवालाहरु, सहरी पूर्वाधारका विज्ञहरु, पत्रकार तथा आम सर्वसाधारणको सहभागिता रहेको थियो ।