श्रीनगर- मिष्ठान्नको क्षेत्रमा विश्वमा बेग्लै पहिचान बनाएको टर्किस आइसक्रिम अब भारतको कश्मीरमा पनि पाइने भएको छ । भारतको जम्मु कश्मीरको राजधानी श्रीनगरमा दुई जना युवा उद्यमी आबिद नसिर र मोइन ऐयुबले टर्किस आइसक्रिमको बिक्री गर्न थालेको हुन् ।

परम्परागत रुपमा बिक्रेताले ग्राहकलाई लामो लौरोका माध्यमबाट कलात्मक रुपमा टर्किस आइसक्रिम बिक्री गर्ने गरेका छन् ।

पछिल्लो समय श्रीनगरमा रहेको सिटी मलमा उनीहरुले थालेको पसलमा टर्किस आइसक्रिमको स्वाद चाख्न र आइसक्रिम बिक्रेताको कला हेर्ने मानिसहरुको भीड लाग्ने गरेको भारतीय समाचार संस्था एएनआईले जनाएको छ ।

परम्परागत टर्की आइसक्रिम स्वादका साथै यसको लचिलो र मुलायमपनका कारण पनि चर्चित रहेको छ ।