नुवाकोट – नेपाली कांग्रेसका सभापति शेरबहादुर देउवाले पार्टीभित्र घात, अन्तर्घात गर्नेलाई कारबाही गरौं भन्दा पार्टीबाटै विरोध हुने बताएका छन् ।

कांग्रेसको नुवाकोट जिल्ला सम्मेलनलाई सम्बोधन गर्दै उनले पार्टीभित्र खुट्टा तानातान हुने गरेको बताए ।

पार्टीमा पहिलेदेखि यस्ता गतिविधि हुने गरेको भन्दै उनले पार्टीलाई सुधार गरेर लैजानुपर्ने बताए । संविधानअनुसार अहिलेको निर्वाचन प्रणालीबाट कुनै पार्टीको पनि बहुमत नआउने भन्दै उनले कसै न कसैसँग मिल्नुपर्ने बाध्यता भएको बताए ।

सभापति देउवाले भने, ‘हाम्रो पार्टी गएको निर्वाचनमा सबैभन्दा ठूलो पार्टी बनेको थियो । तर, हामीले बहुमत पुर्‍याउन सकेनौं । त्यसैले हामीले कसै न कसैसँग मिल्नुपर्छ ।’

देउवाले आगामी निर्वाचनमा एकल बहुमत नभए फेरि ठूलो पार्टी बनाउने प्रयासका साथ अघि बढ्न नेता कार्यकर्तालाई निर्देशन दिए ।