काठमाडौँ- रक ब्याण्ड १९७४ एडीले आज काठमाडौँको टुँडिखेलमा साङ्गीतिक प्रस्तुती दिएको छ ।अटिजमबारे जनचेतना बढाउने उद्देश्यले १९७४ एडीले कन्सर्ट गरेको हो ।

अष्ट्रेलिया सरकारले अपाङ्ग समावेशी विकासलाई प्राथमिकताका साथ प्रवर्द्धन गर्न यो सांगीतिक कार्यक्रम ऐतिहासिक हुने नेपालका लागि अष्ट्रेलियाली राजदूत फेलीसिटी भोल्कले विश्वास लिएकी छिन् ।

१९७४ एडी ब्याण्डले अटिजम सचेतनाको महत्वपूर्ण विषयसँग जोडिएर सांगीतिक प्रस्तुति दिन पाउँदा खुसी लागेको बताएको छ । ‘अटिजमले बोलिरहेको छ र हामीले सुन्ने समय भएको छ,’ ब्याण्डले भनेको छ ।

अष्ट्रेलियन दूतावासको सहयोग एवम् काठमाडौँ महानगरपालिका, अटिजम केयर नेपाल सोसाईटी र १९७४ एडीको सहकार्यमा कन्सर्टको आयोजना गरिएको हो ।