काठमाडौँ- भारतमा कुनै समय अत्यन्त अशान्त र हिंसात्मक सहरको पहिचान बनाएको जम्मु कश्मीरको श्रीनगर सहर विस्तारै स्मार्ट सिटीमा परिणत हुन थालेको छ ।

सन् २०१९ मा सरकारले विशेष राज्यको मान्यता खारेज गरेसँगै यस सहरमा ढुङ्गामुढा, बम विष्फोट र हिंसात्मक आक्रमणजस्ता घटनामा कमी आउन थालेका छन् ।

पछिल्लो समय श्रीनगरमा रहेको ऐतिहासिक लालचोक र घण्टाघरलाई नयाँ स्वरुप दिन थालिएको छ । आगामी मे महिनामा हुन लागेको जी २० को बैठकलाई मध्यनजर गर्दै श्रीनगरमा सुन्दरता थप्न दिनरात काम भइरहेको भारतीय सञ्चारमाध्यमले जनाएका छन् ।

हाल सहरमा ८० भन्दा धेरै विकास परियोजनाको निर्माण कार्य भइरहेको बताइएको छ ।

मुख्य सचिव अरुण कुमारका अनुसार सबै परियोजनाहरू पूरा भएपछि श्रीनगरमा उत्सवको वातावरण हुनेछ । जी २० को बैठकबाट जम्मु कश्मीरको पर्यटन क्षेत्रलाई महत्वपूर्ण टेवा पुग्ने अपेक्षा गरिएको छ ।