काठमाडौँ- १३० किलोमिटर लम्बाईको भारत-बंगलादेश अन्तर्राष्ट्रिय पेट्रोलियम पाइपलाइन आगामी फेब्रुअरी महिनाबाट सञ्चालनमा आउने भएको छ । यस पाइपलाइनले भारत पश्चिम बंगाल राज्यको सिलिगुडीमा रहेको नुमालिगढ प्रशोधन केन्द्रको टर्मिनलबाट बंगलादेशको पार्वतीपुर डिपोलाई जोड्नेछ ।

भारत बंगाल मैत्रि पाइपलाइन नाम दिइएको यो परियोजना आगामी फेब्रुअरी महिनामा सञ्चालनमा आउने आसामबाट प्रकाशित हुने आसाम ट्रिब्युन अखबारको अनलाइन संस्करणले जनाएको छ ।

भारतीय प्रधानमन्त्री नरेन्द्र मोदी र बंगलादेशी समकक्षी शेख हसिनाबीच सन् २०१७ मा हरेक वर्ष १० लाख मेट्रिक टन इन्धन आपूर्ति गर्ने क्षमताको पाइपलाइन निर्माण गर्ने सहमती भएको थियो । यस परियोजना निर्माणको काम सन् २०१८ को सेप्टेम्बर महिनामा सुरु गत डिसेम्बर १२ मा सकिएको थियो ।

३ अर्ब ७७ करोड भारतीय रुपैयाँको लागतमा यस परियोजना निर्माण गरिएको आसाम ट्रिब्युनले जनाएको छ । जसमध्ये ९१ करोड ८४ लाख भारतीय रुपैयाँ भारत सरकारले र बाँकी २ अर्ब ८५ करोड भारतीय रुपैयाँ भारत सरकारको अनुदान सहयोगमा बंगलादेशले लगानी गरेका थिए ।