चितवन– गर्भवती बोकेको एम्बुलेन्स ट्रकमा ठोक्किँदा चार जना घाइते भएका छन् ।

नारायणगढ–मुग्लिङ सडक खण्ड अन्तर्गत रामनगरकाे सडकमा रोकिराखेको ना ७ ख ६४ नम्बरको ट्रकमा गर्भवती बोकेको एम्बुलेन्स ठोक्किँदा चार जना घाइते भएका हुन । उक्त एम्बुलेन्समा गर्भवती सृजना गौतम गोरखाबाट उपचारका लागि भरतपुर आउँदै थिइन् ।

जिल्ला प्रहरी कार्यालय चितवन ट्रकमा ठोक्किएर घाइते भएका मध्ये एम्बुलेन्स चालक गोरखा, सुलिकोट गाउँपालिका– ६ का एक बहादुर सुनार र गर्भवती सृजना गौतमको अवस्था गम्भीर रहेको छ भने गर्भवती गौतमको अनुहार र खुट्टामा गम्भीर चोट लागेको छ।

उनका श्रीमान सुदिप गौतम मध्यम र मिना कोइराला भने सामान्य घाइते भएका छन्।  उनीहरू सबैको उपचार चितवन मेडिकल कलेजमा भइरहेको छ ।

थप अनुसन्धानका लागि ट्रक चालक हेटौँडा उपमहानगरपालिका– १९ का सुरज श्रेष्ठ प्रहरी नियन्त्रणमा छन् ।