खोटाङ– जिल्ला समन्वय समिति खोटाङले पुष्पलाल (मध्यपहाडी) लोकमार्ग अन्तरगत खोटाङको सेखुवा-चखेवा भञ्ज्याङ (१० किलोमिटर) खण्ड कालोपत्रेको काम सम्पन्न गर्ने ‘उपाय’ अपनाउन भौतिक पूर्वाधार तथा यातायात व्यवस्था मन्त्री प्रकाश ज्वालाको ध्यानाकर्षण गराएका छन् । 

पटक-पटक अनुरोध गर्दा र दवाव दिँदा पनि ठेकेदारले सेखुवा–चखेवा खण्ड कालोपत्रेको काम नगरेको भन्दै जिल्ला समन्वय समिति प्रमुख सनबहादुर राईले आइतबार मन्त्री ज्वालालाई ध्यानाकर्षण–पत्र बुझाउँदै कालोपत्रेको काम सम्पन्न गर्ने वातावरण बनाउन आग्रह गरेका हुन् । ‘ठेकेदारलाई धेरै पटक अनुरोध र दवाव दिँदा पनि काम भएन,’ ध्यानाकर्षण–पत्रमा भनिएको छ, ‘कुन उपायबाट हुन्छ, यो खण्डलाई कालोपत्रे गरि यातायात सुचारु गर्ने व्यवस्थाका लागि अनुरोध छ ।’ 

ठेक्का लागेको पाँच वर्ष बित्दा समेत भारत कन्स्ट्रक्सन–मैनाचुली–सिद्धिशाही जेभीले सेखुवा–चखेवा भञ्ज्याङ सडक कालोपत्रेको काम सम्पन्न गर्न सकेको छैन । ठेकेदारले चैत पहिलो साताबाट डिबिएसटीको काम सुरु गर्ने र बैसाख मसान्तसम्ममा डिबिएसटीको काम सम्पन्न गर्ने लगायतका प्रतिवद्धता जनाएका थिए । तर ठेकेदारले आफ्नो ‘सेड्युल’ अनुसार काम नगरेको प्रमुख राईले बताए । 

यस्तै, जिल्ला समन्वय समितिले खोटाङको लाइफलाईनका रुपमा रहेको गाईघाट–दिक्तेल सगरमाथा राजमार्ग अन्तरगत महुरे–फोक्सिङटार सडक कालोपत्रेको काम यथाशिघ्र सम्पन्न गर्नका लागि पहल गर्न माग आग्रह गरेका छन् । महुरे–फोक्सिङटार सडकको महुरे–राजापानीको सिमपानी(२२ किलोमिटर) खण्ड कालोपत्रेको काम भारत कन्ट्रक्सन–सिद्धी शाही र सिमपानी भञ्ज्याङ–फोक्सिङटार खण्ड (२७ किलोमिटर) कालोपत्रेको काम देवनारायण पवनरमैनाचुलीरखाम्पाचे जेभीले गरिरहेको छ । दुबै खण्डको काम निराशाजनक छ । 

महुरे–सिमपानी (राजापानी) सडक निर्माणको ठेक्का लिएको भारत कन्ट्रक्सन-सिद्धी शाही निर्माणस्थलमा रहेका गाडी, क्रसर मेसिन उठाएर हिँडिसकेको छ । पुस अन्तिम सातादेखि निर्माणस्थलबाट उपकरण उठाएर अन्यत्र लैजान थालेको निर्माण कम्पनीले माघ ४ गते क्रसरको सामान उठाएर लगेको हो ।