काबुल- पाकिस्तानले देश छाड्न उर्दी जारी गरेपछि त्यहाँ रहेका अफगान शरणार्थीहरु त्रसित बनेका छन् । गत अक्टोबर ३ मा पाकिस्तानको कामचलाउ सरकारका आन्तरिक मामिलामन्त्री शरफराज बुग्तीले अफगान शरणार्थीहरुलाई आगामी नोभेम्बर १ सम्म देश छाड्न आदेश दिएका थिए ।

यससँगै त्यहाँ रहेका अफगान शरणार्थीहरुको भविष्य अन्यौल हुन पुगेको अफगानिस्तानको खामा प्रेसले जनाएको छ । पाकिस्तान सरकारले यस वर्ष आफ्नो मुलुकमा भएका २४ मध्ये १४ आत्मघाती आक्रमणमा अफगान नागरिकको संलग्नता रहेको भन्दै काजगजातविहीन अफगान शरणार्थीहरुलाई आफैँ देश छाडेर जान अन्यथा बल प्रयोग गर्ने निर्देशन दिएको छ ।

यद्यपि कस्तो बल प्रयाग गरी कसरी अफगान शरणार्थीलाई स्वदेश फर्काउने भन्ने विषयमा भने इस्लामावादले कुनै विवरण सार्वजनिक नगरेको खामा प्रेसले उल्लेख गरेको छ ।

पाकिस्तान सरकारको यस निर्णयलाई अफगानिस्तानमा शासन चलाइरहेको तालिबान सरकारमाथि दबाब बढाउने रणनीतिका रुपमा हेरिएको छ ।

संयुक्त राष्ट्रसंघीय शरणार्थी निकाय युएनएचसीआरका अनुसार पाकिस्तानमा हाल ३७ लाख अफगान शरणार्थीहरुको बसोबास छ । यीमध्ये केबल १४ लाख अफगान शरणार्थीमात्रै औपचारिक रुपमा दर्ता भएका छन् । यूएनएचसीआरले पाकिस्तानलाई आफ्नो निर्णयबारे पुनर्विचार गर्न आग्रह गरेको छ ।