काबुल- अफगान पाकिस्तान सीमा क्षेत्रमा पर्ने टोखराम नाका बन्द भएको विरोधमा अफगानिस्तानको ननगरहार प्रान्तमा प्रदर्शनको आयोजना गरिएको छ । लगातार नाका बन्द हुँदा जनजीवन अस्तव्यस्त बनेको भन्दै स्थानीयहरुले प्रदर्शन गरेका हुन् ।

अफगानिस्तानको टोलो न्यूजका अनुसार पाकिस्तानले विभिन्न बहाना बनाउँदै नाका बन्द गरेपछि प्रदर्शनमा उत्रिनुपरेको स्थानीयले बताएका छन् । उनीहरुले अफगान एवम् पाकिस्तानी कूटनीतिज्ञहरुलाई वार्ताका माध्यमबाट तत्काल नाकामा कायम समस्याको समाधान गर्न आह्वान गरेका छन् ।

हालै पाकिस्तान अफगानिस्तान संयुक्त चेम्बर अफ कमर्शले नाका बन्द हुँदा सीमा क्षेत्रका दुबै तर्फका व्यापारीलाई १ अर्ब डलरको नोक्सान भइसकेको उल्लेख गरेको छ ।

अस्थीर सुरक्षा अवस्था रहेको अफगानिस्तान र पाकिस्तानबीचको सीमा क्षेत्रमा दुई मुलुकका सुरक्षाकर्मीबीच झडपका घटना सार्वजनिक हुने गरेको छ ।