काठमाडौँ- इन्जिनियरिङ अध्ययन संस्थानले एकलौटी शुल्क वृद्धि गर्न लागेको भन्दै तीन विद्यार्थी संगठनले आन्दोलन गर्ने चेतावनी दिएका छन् ।

नेपाल विद्यार्थी संघ, अखिल (क्रान्तिकारी) र समाजवादी विद्यार्थी युनियन नेपालले शुक्रबार ललितपुरमा पत्रकार सम्मेलन गर्दै विद्यार्थीहरुसँग यसअघि भएको सहमतिविपरीत इन्जिनियरिङ अध्ययन संस्थानले एकलौटी शुल्क वृद्धि गर्न लागेको भन्दै आन्दोलन गर्ने चेतावनी दिएका हुन् ।

यसअघि करिब ३ लाख रहेको शुल्कलाई वृद्धि गरी ७ लाख ७५ हजार पु¥याएपछि यसअघि आन्दोलित विद्यार्थी र प्रशासनबीच तत्काल शुल्क वृद्धि नगर्ने सहमति भएको थियो । तर शुल्क समायोजन गर्न गठित ११ सदस्यीय समितिले पुन ५ लाख भन्दा बढी शुल्क लिन सिफारिस गरेको भन्दै उनीहरुले आपत्ति जनाएका हुन् ।

पत्रकार सम्मेलनमा नेविसंघका अध्यक्ष दुजाङ शेर्पाले इन्जिनियरिङ अध्ययन संस्थानका कारण ६२÷६३ मा पनि नरोकिएको इन्जिनियरिङको परिक्षा रोकिएको आरोप लगाए । उनले परिक्षालाई सहज रुपमा अघि बढाउन यसअघि विद्यार्थीहरुले संस्थानसँग सहमति गरेपनि सम्झौताको मसी सुक्न नपाउँदै इन्जिनियरिङ अध्ययन संस्थानले पुन शुल्क वृद्धि गर्न खोजेको अरोप लगाए ।

त्यस्तै अखिल क्रान्तिकारीकी अध्यक्ष पञ्चा सिंहले अहिले ५ लाख ५४ हजार शुल्क तोक्ने तयारी भइरहेको भन्दै विद्यार्थीहरुलाई स्वीकार्य नहुने स्पष्ट पारिन् । उनले संस्थानको सुधारका लागि आफूहरु प्रतिबद्ध रहेपनि विद्यार्थीहरुलाई मर्कामा पार्ने गरी गर्न लागिएको शुल्क वृद्धि कार्यान्वयन नगर्न सुझाव दिइन् ।

संस्थानलाई घाटाको त्रास देखाएर राज्यलाई अर्बौं घाटा हुनेगरी प्रवेश परीक्षा धकेल्ने षड्यन्त्र भइरहेको भन्दै उनीहरुले विद्यार्थी र संस्थानको भविष्यमाथि गम्भीर हुन पनि ध्यानाकर्षण गराएका छन् ।