काठमाडौं । आइसीसी विश्वकप एकदिवसीय छनोटको आफ्नो अन्तिम वार्मअप खेलमा नेपालले ओमानलाई पराजित गरेका छ । जिम्बावेको हरारेमा बिहीबार भएको खेलमा ओपनर कुशल भुर्तेलको उत्कृष्ट शतकको सहयोगमा नेपालले ओमानलाई २ विकेटले पराजित गरेको हो ।

ओमानले दिएको २ सय ६८ रनको लक्ष्य नेपालले ४४ दशमलव ५ ओभरमा आठ विकेट गुमाउँदै पुरा गर्यो । नेपालका लागि कुशल भुर्तेल ९४ बलमा सर्वाधिक १ सय १ रन, भीमले ७४ बलमा ५६ रन, आसिफ शेखले २३ को योगदान गरे । यस्तै कप्तान रोहितकुमार पौडेलले ३१, दीपेन्द्रसिंह ऐरीले २२ बलमा २६ रन बनाए । भने सन्दीप लामिछाने १ बलमा ६ रन बनाउँदै अविजित रहे ।

ओमानका लागि अकिब ईलियासले ४ तथा फैयाज बटले २ विकेट लिए ।

त्यसअघि टस जितेर पहिले ब्याटिङ गरेको ओमान ४९ दशमलब २ ओभरमा अलआउट हुदै २ सय ६७ रन बनायो ।

ओमानका लागि कप्तान जिशान मकसुदले १ सय ६ बलमा १ सय ९ रनको शतकीय ईनिङ खेले । त्यस्तै सोयब खानले ३८, सन्दीप गोडीले ३१ बलमा १५ तथा नसिम खुसिले ९ बलमा १७ रन बनाए ।

नेपालका लागि सोमपाल कामीले ५ तथा सन्दीप लामिछानेले ३ विकेट लिए । करण केसी, प्रतिश जि।सीले समान १/१ विकेट आफ्नो नाम गरे ।

विश्वकप छनोट आगामी आईतबारबाट सुरु हुनेछ । विश्वकप छनोटको पहिलो खेलमा नेपालले आईतबार घरेलु टोली जिम्बावेसँग खेल्नेछ ।