दोहा – कुवेतमा पक्राउ परेका नेपालीलाई प्रहरीको गाडीबाट भगाउन सहयोग गर्ने एक नेपाली युवती पक्राउ परेकी छन्।

कम्पनीबाट तलब नपाएको भन्दै जम्मा भएका भीडलाई सुरक्षाकर्मीले कारबाही गरिरहेका बेला प्रहरीको गाडीको ढोका खोलेर पक्राउ परेका नेपाली युवालाई भगाउन सहयोग गरेको आरोपमा युवतीलाई पक्राउ गरिएको कुवेत प्रहरीले जनाएको छ।

प्रहरीका अनुसार फरार रहेका ती महिलासहित युवकलाई पनि पक्राउ गरिएको छ। कुवेत सरकारले सार्वजनिक व्यवस्था उलङ्घन गरेको आरोपमा दुवैलाई देश निकाला गर्ने निर्णय गरेको गृह मन्त्रालयलाई उद्धृत गर्दै अरब टाइम्सले जनाएको छ।

कुवेतले कानुन उल्लङ्घनका क्रममा पक्राउ परेकाहरूलाई देश निकाला गर्दै आएको छ। कुवेतमा ठुलो सङ्ख्यामा नेपालीले पनि आवासीय कानुन उल्लङ्घन गरी बसिरहेका त्यहाँस्थित विभिन्न संघसस्थाहरुले बताउने गरेका छन्।

उनीहरुलाई पनि पक्राउ परेको खण्डमा कुवेतले देश निकाला गर्नेछ। कुवेतले पछिल्लो समय गैर कानुनी रूपमा बस्दै आएका विदेशी नागरिकहरूलाई पक्राउ अभियान तीव्र पारेको छ।