काठमाडौँ : प्रतिनिधिसभा सांसद तथा राप्रपाका महामन्त्री धवल शमशेर राणाले पोखरामा भएको विमान दुर्घटनाप्रति दुःख व्यक्त गरेका छन् । मानवीय वा प्राविधिक कारण जेसूकै भएपनि चालकदलसहित ७२ जनाको मृत्यु हुने गरि भएको यति एयरलाइन्सको विमान दुर्घटनाप्रति राणाले दुःख व्यक्त गरेका हुन् ।

साथै उनले नेपालको हवाई सुरक्षाका विषयमा अब गम्भीर भएर सोच्ने बेला आएको पनि टिप्पणी गरेका छन् । नेपाली आकाश युरोपेली युनियन अथवा इयुको कालोसूचिमा रहेका बेला विमान दुर्घटना भइरहनुले गम्भीर अवस्था निम्त्याएको पनि उनले बताए ।

सरकारले छानबिन आयोग गठन गरेका कारण दुर्घटनाको वास्तविकता पत्ता लाग्ने भएपनि दुर्घटना रोक्नका लागि केही कडा कदम चाल्नुपर्ने उनको भनाई छ ।

‘पोखरामा भएको विमान दुर्घटनाले दुःखी बनाएको छ । मृत्तकप्रति श्रद्धाञ्जली र परिवारजनमा गहिरो समवेदना’ उनले खबरहबसँग भने, ‘तर यति भनेर मात्रै पुग्दैन । अब नेपालको हवाई सुरक्षाबारे गम्भीर रुपमा सोच्नैपर्छ । यसका लागि सरकारले कडा कदम चाल्नुपर्छ । अब ढिला गर्नु हुँदैन ।’