काठमाडौँ : पोखरामा दुर्घटनामा परेको यति एयरलाइन्सको विमानमा एक डाक्टर दम्पत्ति पनि सवार रहेको खुलेको छ । आइतबार काठमाडौंबाट पोखराका लागि उडेको यति एयरलाइन्सको एन एनएनसी एटीआर विमान आइतबार बिहान १० बजेर ५१ मिनेट जाँदा पोखराको सेती खोचमा दुर्घटना परेको हो ।

विमानमा राष्ट्रिय ट्रमा सेन्टरमा कार्यरत अर्थोपेडिक सर्जन डा. सुशील श्रेष्ठ र उनकी श्रीमती डा. सोना दिवाकर पनि सवार रहेको पुष्टि भएको हो ।

उनीहरु आफ्नो सन्तानसमेत लिएर पोखरा बिदा मनाउन पुगेका थिए । राष्ट्रिय ट्रमा सेन्टरका निर्देशक डा. रुद्र मरासिनीका अनुसार डा. श्रेष्ठले शनिबार र अस्ति ओटी गरेर दुई दिन बिदा बस्न चाहेको जानकारी आफुलाई दिएको बताए ।

‘शनिबार किष्ट मेडिकल कलेजमा भएको स्पाइनल सोसाइटीको बैठकमा पनि श्रेष्ठसँगै हामी थियौँ । तर अहिले घरपरिवारमा सबै आत्तिएको अवस्था छ’ उनले भने । तर उनीहरुको अवस्थाका बारेमा अहिलेसम्म खुलेको छैन ।

चिकित्सा विज्ञान राष्ट्रिय प्रतिष्ठान न्याम्सबाट अर्थोपेडिक सर्जरीमा एमडी गरेका डा. श्रेष्ठले गण्डकी मेडिकल कलेज र म्याग्दीको दरबाङ स्वास्थ्य चौकीमा मेडिकल अधिकृतका रुपमा काम गरेका थिए ।

पोखरा स्थायी घर भएका डा. श्रेष्ठ काठमाडौं मेडिकल कलेजबाट एमबीबीएस गरेका हुन् ।