काठमाडौँ– राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले कोसी प्रदेश सरकार गठनमा पक्षधरता देखाएको भन्दै राष्ट्रपति रामचन्द्र पौडेलको आलोचना गरेका छन् ।

आज बिहान सामाजिक सञ्जाल फेसबुकमार्फत उनले कोसी सरकार गठनमा नेपाली कांग्रेसका शेखर कोइराला पक्षका केदार कार्कीले उम्मेदवारी दिएपछि त्यसलाई रोक्नका लागि राष्ट्रपति पौडेलले गरेको फोन संवादले राष्ट्रपति साझा नदेखिएको टिप्पणी गरेका हुन् ।

थापाले राष्ट्रपतिबाट प्रदेश सरकारका विषयमा एक पक्षको समर्थन गर्नुले राष्ट्रपति पार्टी राजनीतिमा संलग्न देखिएको भन्दै राजीनामा दिनुपर्ने बताएका हुन् । 

उनले भनेका छन्– ‘कोसी प्रदेशमा मुख्यमन्त्री छान्ने प्रक्रियामा गठबन्धनको पक्षमा राष्ट्रपति रामचन्द्र पौडेलको सक्रियताले नेपालमा राष्ट्रपति सबैको साझा हुनसक्दैन भन्ने फेरि प्रमाणित भएको छ। पार्टी राजनीतिमा संलग्न पौडेललाई पदमा बस्ने नैतिकता छैन। तत्काल राजीनामा दिन रामचन्द्र पौडेललाई आग्रह गर्दछु ।’