काठमाडौँ– अभिनेत्री दिया पुनले अफ्रिकाको सबैभन्दा अग्लो हिमाल माउन्ट किलिमन्जारोको सफल आरोहण गरेकी छिन् । दियाले स्थानीय समयअनुसार शनिबार बिहान साढे ७ बजे उक्त पाँच हजार ८९५ मिटर अग्लो हिमालको शिखरमा पुगेको सामाजिक सञ्जालमार्फत जानकारी दिएकी छिन् । किलिमन्जारो हिमाल अफ्रिकी मुलुक तान्जानियामा अवस्थित छ ।

किलिमन्जारोको शिखरमा उनले नेपाली झण्डासमेत फहराएकी थिइन् । उक्त हिमालको चुचुरोमा पुगेर आफ्नो अर्को एक सपना पूरा भएको दियाले उल्लेख गरेकी छिन् । दियाले गत वर्षको जेठमा विश्वकै सर्वोच्च शिखर सगरमाथाको सफलतापूर्वक आरोहण गरेकी थिइन् भने यसअघि आठ हजार १६३ मिटर अग्लो मनास्लु हिमालको समेत आरोहण गरिसकेकी थिइन् । विश्वका सात वटा अग्ला हिमालको आरोहण गर्ने आफ्नो लक्ष्य रहेको दियाले बताउँदै आएकी छिन् ।

दियाको पछिल्लो फिल्म ‘अन्तिम संस्कार’ केही समयअघि प्रदर्शनमा आएको थियो भने आगामी फिल्म ‘दयारानी’ रिलिजको तयारीमा छ । उनले फिल्म ‘वीर विक्रम’बाट अभिनय यात्रा सुरु गरेकी थिइन् ।