काठमाडौँ- नेपाली कांग्रेसका प्रतिनिधिसभा सदस्य प्रदिप पौडेलले उचित कानुनी दायराभित्र रहने गरी टिकटकलाई सञ्चालन गर्न दिइनुपर्ने बताएका छन् ।

सोमबार सरकारले टिकटक बन्द गर्ने निर्णय गरेसँगै सामाजिक सञ्जालमा स्टाटस लेख्दै सांसद पौडेलले आजको सूचना प्रविधिको युगमा सामाजिक सञ्जाललाई बन्द गर्ने नभइ दुरुपयोग हुन नदिन कडाई गरिनुपर्ने उल्लेख गरेका छन् ।

‘हाल सामाजिक सञ्जालहरु सूचना प्राप्त गर्न र मनोरञ्जनका लागि मात्र नभइ व्यवसाय सञ्चालनमा समेत सहयोगी बन्दै आएका छन् ।’ उनले लेखेका छन्, ‘राज्यले सामाजिक सञ्जालको प्रयोग रोक्ने होइन, दुरुपयोग हुन नदिन कडाइ गर्ने हो ।’

दुरुपयोग सबै ठाउँमा हुने भन्दै सांसद पौडेलले सरकार स्वयंले नै सच्याउनुपर्ने कुरा सबैभन्दा बढी रहेको उल्लेख गरे ।

‘नागरिक स्वतन्त्रता उपभोग गर्न चाहन्छन् । पारदर्शीता, खुल्लापन नरुचाउनेहरु कर्तुत लुकाउन चाहनेहरु मात्र हुन् ।’ उनले लेखेका छन्, ‘बेथिति अन्त्य गर्ने नाममा स्वतन्त्रतालाई खुम्च्याउने र अन्तिममा खोस्ने कार्य किमार्थ स्वीकार्य हुन सक्दैन ।’