काठमाडौँ – नेपाल कम्युनिस्ट पार्टी (एमाले)का महासचिव शंकर पोखरेलले सरकारकै कारण संसद अवरुद्ध भइरहेको बताएका छन् ।आइतबार साँझ सामाजिक सञ्जालमार्फत महासचिव पोखरेलले सुन प्रकरणको छानबिनका लागि समिति गठन गर्नुपर्ने आफूहरुको माग सरकारले उपेक्षा गरेकै कारण संसद अवरोध गर्न बाध्य भएको बताएका हुन् ।

उनले राज्यको माथिल्लो निकायको संलग्नता विना सुन तस्करी हुन नसक्ने भन्दै उच्चस्तरीय समिति गठन नगरी स्वच्छ छानबिन हुन नसक्ने उल्लेख गरेका छन् । उनले लेखेका छन्, ‘ उच्चस्तरिय छानविन समिति गठनगर्ने मागलाई उपेक्षा गर्नु नै संसद अवरोधको कारण हो । राज्यको मथिल्लो निकायको संलग्नता विना यति ठुलो परिमाणमा सुनतस्करी हुनसक्तैन भन्ने कुरा जो कोहीले पनि वुझ्न सक्ने कुरा हो । राजश्व प्रशासन र सुरक्षा निकायको स्पष्ट कमजोरी देखिनेकुराको छानविन उनीहरुवाट नै गराउछौ भन्नु राजनीतिक संलग्नताको आशंकालाई बल पुर्याउने कुरा हो ।’