काठमाडौँ- पोल्याण्डलगायत विभिन्न देश पठाउने भन्दै भिजिट भिसामा बंगलादेशी नागरिकलाई नेपाल ल्याएर बन्धन बनाई रकम असुल्ने गिरोहलाई प्रहरीले पक्राउ गरेको छ ।

काठमाडौं उपत्यका अपराध अनुसन्धान कार्यालयले आइतबार काठमाडौंमा पत्रकार सम्मेलन गर्दै बंगलादेशी नागरिकहरुलाई बन्धक बनाएर रकम असुलेको आरोपमा सात जनालाई पक्राउ गरी सार्वजनिक गरेको हो ।

पक्राउ पर्नेमा दुई नेपाली र पाँच बंगलादेशी नागरिक छन् । पक्राउ परेका नेपालीमा इलाम घर भएकी रोशनी राई र सिन्धुपाल्चोक घर भएकी तारा नेपाली छन् । त्यसैगरी प्रहरीले बंगलादेशी नागरिकहरु अमिर हुसेन, मोहम्मद मोसिह्युर, सलिम मिया, जहाँगीर अलाम र ताहमिना बेगम रहेका छन् ।

उनीहरुले बंगलादेशबाट विभिन्न प्रलोभन देखाएर नेपाल ल्याई बन्धक बनाएर परिवारसँग रकम मागेको काठमाडौं उपत्यका अपराध अनुसन्धान कार्यालयका प्रमुख एसएसपी मनोज केसीले जानकारी दिए ।

आफूहरुसँग भएको रकम असुलेर परिवारसँग पनि फोनमार्फत रकम असुल गर्न खोजेपछि एक बंगलादेशी नागरिकले उजुरी दर्ता गराएको र अनुसन्धान पछि गिरोहलाई पक्राउ गर्न सफल भएको उनले बताए ।

विदेश पठाउन प्रक्रियाका लागि केही रकम लाग्ने भन्दै सुरुमा बंगलादेशमै ५० हजारदेखि १० लाख टाकासम्म लिएको खुलेको उनले जानकारी दिए ।

पत्रकार सम्मेलनमा बंगलादेशी पीडित नागरिकहरुले आफूहरुलाई एजेन्टले पोल्याण्डलगायतका देश पठाउनका लागि पाँच लाख रुपैयाँ लिएर नेपाल पठाएको र नेपाल आएपछि बन्धक बनाएको बताए । नेपाल आएपछि आफूहरुसँग खर्चका लागि भएको पैसा, मोबाइल पनि लिएको उनीहरुले बताएका छन् ।

काठमाडौं उपत्यका अपराध अनुसन्धान कार्यालयले पक्राउ परेकाहरुमाथि मुलुकी अपराध संहिताका साथै संगठित अपराध ऐन बमोजिमको कसुरमा थप अनुसन्धान तथा कारवाहीका लागि प्रहरी परिसर काठमाडौं पठाएको जनाएको छ ।