नयाँ दिल्ली- भारतले कृषि उत्पादनको भण्डारणलाई वृद्धि गर्नका लागि नयाँ कार्यक्रमको घोषणा गरेको छ । किसानको आय बढाउनका लागि भारत सरकारले नयाँ कार्यक्रम ल्याएको भारतीय समाचार संस्था एनडीटीभीले जनाएको छ ।

त्यहाँका केन्द्रीय मन्त्री अनुराग ठाकुरले घोषणा गरेको नयाँ कार्यक्रमलाई सहकारी क्षेत्रमा विश्वकै सबैभन्दा ठूलो खाद्यान्न भण्डारण कार्यक्रमको संज्ञा दिइएको छ । यस कार्यक्रमका लागि भारत सरकारले १ लाख करोड भारतीय रुपैयाँ विनियोजन गर्ने एनडीटीभीले जनाएको छ ।

यस कार्यक्रमले सहकारी क्षेत्रलाई थप सुधार गर्ने अपेक्षा गरिएको छ । यस कार्यक्रमबाट भारतको खाद्यान्न भण्डारण क्षमता ७ करोड टनले बढ्ने अपेक्षा गरिएको छ । हाल भारतको खाद्यान्न भण्डारण क्षमता १४ करोड ५० लाख टन हाराहारी रहेको बताइन्छ ।

नयाँ कार्यक्रमबाट आगामी ५ वर्षमा यो क्षमता बढेर २१ करोड ५० लाख टन पुग्ने अपेक्षा गरिएको छ ।

भण्डारण क्षमताको अभावका कारण अन्न खेर गइरहेको र यसबाट किसानहरुको आयमा असर परिरहेको भन्दै मन्त्री ठाकुरले यस कार्यक्रमबाट भारतको खाद्य सुरक्षामा टेवा पुग्ने बताएका छन् ।