काठमाडौं– नेपाल प्रहरी प्रधान कार्यालय सवारी महाशाखा सामाखुशीले ३० जना प्राविधिक प्रहरी कर्मचारीहरुलाई हलुका सवारी चालक तालिम प्रदान गरेको छ । 

राष्ट्रिय प्रहरी प्रशिक्षण प्रतिष्ठान महाराजगंजको तत्त्वावधानमा उक्त महाशाखामा सञ्चालित हलुका सवारी चालक तालिम २५ औं समूह अन्तर्गत उनीहरूलाई उक्त तालिम प्रदान गरिएको हो । 

सोही महाशाखामा मंगलबार आयोजित तालिम समापन कार्यक्रममा महाशाखाका प्रमुख प्रहरी वरिष्ठ उपरीक्षक दिनेश केसीले प्रशिक्षार्थी तथा प्रशिक्षकहरूलाई प्रमाणपत्र वितरण गरे । 

उक्त अवसरमा प्रहरी वरिष्ठ उपरीक्षक केसीले हलुका सवारी साधनको परिचालन, रेखदेख र मर्मत सम्भार गर्न समयसापेक्ष नयाँ प्रविधिको बारेमा दक्षता अभिवृद्धि गर्न तालिम प्रदान गरिएको बताए । प्रशिक्षार्थीले तालिमबाट प्राप्त गरेका ज्ञान, सीप र क्षमताको विकास गरी कार्यक्षेत्रमा त्रुटिरहित ढंगबाट कार्यसम्पादन गर्नुपर्नेमा उनले जोड दिए ।

कार्यक्रममा तालिम संयोजक प्रहरी निरीक्षक अशोक केसीले तालिम सम्बन्धी प्रतिवेदन प्रस्तुत गर्दै गत वैशाख ५ गतेबाट सञ्चालित ४५ कार्यदिन अवधि रहेको उक्त तालिममा प्राविधिक प्रहरी जवान ३० जना प्रशिक्षार्थीको सहभागिता रहेको जानकारी दिए ।