काठमाडौँ– एसीसी यू–१९ प्रिमियर कप क्रिकेटमा नेपालले इरानविरुद्ध ३ सय ५४ रनको विशाल लक्ष्य दिएको छ ।

मलेसियाको बान्गीमा जारी खेलमा टस हारेर पहिले ब्याटिङको निम्तो पाएको नेपालले ४० ओभर १ बलमा अलआउट हुँदै ३ सय ५३ रन बनायो ।

नेपालका देव खनालले १ सय रनको शतकीय इनिङ खेले । यस्तै, दीपक प्रसाद डुम्रेले ६९ र दीपक बोहराले ६५ रनको अर्धशतकीय पारी खेले । यसैगरी, दीपेश कँडेलले २९, हेमन्त धामीले २३, आकाश चन्दले १९ तथा सुवास भण्डारीले १८ रन बनाए ।

इरानका दाद्रहमान राइसी र सल्मान निआजमान्डले समान तीन– तीन विकेट लिए । यस्तै, जेइद साइसी र समान शेखीले दुईदुई विकेट लिए ।

प्रिमियर कपमा एसियाका १६ एसोसिएट टोलीले प्रतिस्पर्धा गर्दैछन् । जसलाई चार समूहमा विभाजन गरिएको छ । नेपाल रहेको समूह ए मा बहराइन, साउदी अरेबिया र इरान रहेका छन्।

नेपालले दोस्रो खेल असोज २८ गते बहराइनसँग र तेस्रो खेल कात्तिक २ गते साउदी अरेबियासँग खेल्नेछ ।

यस्तै, समूह ‘बी’ मा यूएई, ओमान, कतार र चीन, समूह ‘सी’मा सिंगापुर, कुवेत, थाइल्यान्ड र माल्दिभ्स तथा समूह ‘डी’ मा हङकङ, मलेसिया जापान र इन्डोनेसिया छन्।

शीर्ष तीन टोलीले आगामी डिसेम्बरमा पाकिस्तानमा हुने १९ वर्ष मुनिको एसिया कप खेल्न पाउनेछन् । यो विश्वकप अघिको तयारी हो । विश्वकप २०२४ जनवरीमा श्रीलंकामा हुनेछ ।