काठमाडौँ– प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहालकी पत्नी सीता दाहाललाई अस्पताल भर्ना गरिएको छ ।

लामो समयदेखि अस्वस्थ उनको स्वास्थ्य अवस्था गम्भीर बनेपछि गएराति थापाथलीस्थित नर्भिक अस्पतालमा भर्ना गरिएको हो । अर्धअचेत अवस्थामा रहेकी दाहालको स्वास्थ्यमा कुनै सुधार नआएको बताइएको छ ।

प्रधानमन्त्री दाहाललगायत माओवादी केन्द्रका मन्त्री तथा नेताहरू अहिले नर्भिक अस्पतालमा भेला भएका छन् । 

प्रधानमन्त्री पत्नी सीता लामो समयदेखि जटिल प्रकारको रोग प्रोग्रेसिभ सुपरान्युक्लियर पाल्सी (पीएसपी) बाट पीडित छिन् । चिकित्सकअनुसार यो पूर्ण रूपमा निको नहुने र रोकथाम मात्र गर्न सकिने रोग हो । यो रोग निकै कम मानिसमा देखिने गर्दछ ।

सीता दाहालको स्वास्थ्य अवस्थाबारे बिहान साढे ९ बजे नर्भिक अस्पतालले बुलेटिन जारी गरेर जानकारी दिने बताइएको छ ।