काठमाडौँ- भारतको जम्मु कश्मीरमा खनिज पदार्थ लिथियमको भण्डार फेला परेको छ । भारतीय सञ्चारमाध्यमले जम्मु कश्मीरमा ५९ लाख टन क्षमताको लिथियम भण्डार फेला परेको जानकारी दिएका छन् ।

भारतको भौगर्भिक सर्वेक्षण (जीएसआई) ले जम्मु कश्मीरको रेयासी जिल्लामा लिथियम भण्डार पत्ता लगाएको भारतीय टेलिभिजन एनडीटीभीको अनलाइन संस्करणले जनाएको छ । रेयासी जिल्लाको माता वैष्णेदेवी मन्दिर आसपास फेला परेको लिथियमको गुणस्तर उत्कृष्ट रहेको जम्मु कश्मीरको खनिज सचिव अमित शर्माले भारतीय समाचार संस्था पीटीआईलाई जानकारी दिएका छन् ।

भारतीय सञ्चारमाध्यमका अनुसार सामान्यतः लिथियमको गुणस्तर २२० पाट्स पर मिलियन (पीपीएम) हुने बताइन्छ । यद्यपि जम्मु कश्मीरमा फेला परेको लिथियमको गुणस्तर ५०० पीपीएम रहेको खनिज अधिकारीले जनाएका छन् ।

विद्युतीय सामग्री उत्पादनका लागि अत्यावश्यक पर्ने लिथियम यसअघि भारतमा उपलब्ध थिएन । यसअघि भारतले आवश्यक पर्ने सम्पूर्ण लिथियम विदेशबाट आयात गर्दै आएको थियो ।