रुकुम पश्चिम – रुकुम पश्चिमका भूकम्पपीडितका लागि एकै दिनमा दुई हजार छ सय ३२ थान त्रिपाल प्राप्त भएका छन् । जिल्लाको चौरजहारी र मुसीकोट नगरपालिकाको सल्ले विमानस्थलमा ती त्रिपाल प्राप्त भएका हुन् । उपप्रधानमन्त्री तथा रक्षामन्त्री पूर्णबहादुर खड्काको सक्रियतामा त्रिपाल ल्याइएको हो ।

मन्त्री खड्काको अगुवाइमा थप चार सय ४० थान त्रिपाल जिल्ला भित्रिएको सहायक प्रमुख जिल्ला अधिकारी प्रवेश बढुवालले जानकारी दिए ।

जिल्लामा एक चरणको त्रिपाललगायत खाद्यान्न सामग्री पुगिसकिएकाले अब भूकम्पपीडितका लागि अस्थायी संरचना बनाउनतर्फ ध्यान दिन जिल्ला विपद् व्यस्थापन समितिलाई मन्त्री खड्काले आग्रह गरेका छन्। पूर्ण क्षति भएका र आंशिक क्षति भएका घरपरिवारलाई एकै चरणमा रकम उपलब्ध गराएर शीघ्र पुनःस्थापनामा लाग्नुपर्नेमा उनले जोड दिएका छन् ।

आज चौरजहारी नगरपलिका, सानीभेरी गाउँपालिका, मुसीकोट नगरपालिकामा पाँच–पाँच सय, बाँफीकोट गाउँपालिकामा दुई सय ९२ र त्रिवेणी गाउँपालिकामा चार सय त्रिपाल पठाइएको छ । बाँकी त्रिपाल प्रभावित क्षेत्रमा भोलि पठाइने प्रमुख जिल्ला अधिकारीले राससलाई जानकारी दिए ।