दैलेख- दैलेखमा जंगली जडीबुटी खाँदा एक जनाको मृत्यु भएको छ । जिल्लाको भगवतिमाई गाउँपालिमा जङ्गली जडीबुटी खाएका एक जनाको मृत्यु भएको हो । ‘ठूलो ओखती’ नामले चिनिने जंगली जडीबुटी खाएर गाउँपालिका–४ तुर्सुका २५ बर्सिया नर्तम विकको आज मृत्यु भएको हो ।

केही दिन अघिदेखि ज्वरोले थला परेका तीन जनाले घरमा राखिएको ‘ठूलो ओखती’ नामले चिनिने जंगली जडीबुटी खाएका थिए । जङ्गली जडीबुटी खाएका तीन जनामध्ये एक जनाको मृत्यु भएको र अन्य दुई जनाको स्वास्थ्य अवस्था गम्भीर रहेको दैलेखका प्रहरी प्रमुख किशोर लम्सालले बताए ।

जङ्गली जडीबुटी ‘ठूलो ओखती’ खाएर गम्भीर घाइते हुनेमा सोही ठाउँका ६१ वर्षीय धने कामी र १२ वर्षीय रमेश विक रहेका छन् । स्वास्थ्य अवस्था गम्भीर रहेका दुई जनालाई थप उपचारका सुर्खेत पठाइएको प्रहरी प्रमुख लम्सालले बताए ।