काठमाडौँ- दशौं नेपाल–भारत लाइन अफ क्रेडिट (एलओसी) समीक्षा बैठक सम्पन्न भएको छ । बैठकमा नेपाल भारत सहकार्य कार्यान्वयनका विभिन्न चरणमा रहेका परियोजनामा भएका प्रगतिबारे समीक्षा गरिएको थियो । बैठकका लागि नेपाल आएको भारतीय टोलीले भारत सरकारको ऋण सहयोगमार्फत् निर्माण भइरहेका सडक परियोजनाहरुको स्थलगत भ्रमण पनि गरेको थियो ।

भारतले नेपाललाई १.६५ अर्ब अमेरिकी डलर लाइन अफ क्रेडिट उपलब्ध गराइसकेको छ । लाइन अफ क्रेडिटअनुरुप उपलब्ध गराइएको यो रकम नेपाल सरकारले प्राथमिकतामा राखेको पूर्वाधार विकासमा लगानी गरिनेछ ।

यसरी प्राप्त ऋण रकम हालसम्म ४० भन्दा बढी सडक परियोजना, ६ वटा जलविद्युत तथा प्रसारण लाइन र विभिन्न आवास तथा पुनःनिर्माण परियोजनामा खर्च भएको छ ।

बैठकमा नेपालका तर्फबाट अर्थ मन्त्रालयका सहसचिव श्रीकृष्ण नेपालले बैठकको नेतृत्व गरेका थिए भने भारतीय विदेश मन्त्रालयअन्तर्गतको विकास साझेदारी प्रशासनका सहसचिव ए. अजय कुमारले भारतीय राजदूतावास र एक्जिम बैंकका प्रतिनिधि सम्मिलित टोलीको नेतृत्व गरेका थिए ।

भारतले ६० भन्दा बढी साझेदार राष्ट्रलाई ३० अर्ब अमेरिकी डलर भन्दा बढीको लाइन अफ क्रेडिट उपलब्ध गराइसकेको छ ।