काठमाडौँ – शुक्रबार राष्ट्रपति विद्यादेवी भण्डारीको सवारीको क्रममा ट्रमा सेन्टरका चिकित्सकमाथि भएको हातपातको विरोधमा माइतीघर काठमाडौँमा विरोध प्रदर्शन भएको छ ।

११:३० मा विरोध प्रदर्शन हुने भनिए पनि झन्डै १ बजे भएको प्रदर्शनमा प्रदर्शनकारी भन्दा प्रहरी धेरै जम्मा भएका थिए । प्रहरीको लाठीचार्जबाट राष्ट्रिय ट्रमा सेन्टरका चिकित्सक डा. जनिथलाल सिंह घाइते भएका थिए।

आफू चिकित्सक भएको र वीर अस्पताल जान लागेको भन्दै कार्ड देखाउँदासमेत सुरक्षाकर्मीले उनको कार्ड खोसेर लाठी प्रहार गरेको सेन्टरका निर्देशक डा.रुद्र मरासिनीले बताएका थिए। गम्भीर घाइते सिंहको ट्रमा सेन्टरमा उपचार भइरहेको छ।

संघीय संसदको संयुक्त सदनलाई सम्बोधन गरेर राष्ट्रपति भण्डारी फर्कने क्रममा वीर अस्पताल बाहिर हिँडेका चिकित्सक सिंहलाई त्यहाँ सुरक्षामा खटिएका प्रहरीले लाठी चार्ज गरेका थिए । उनको टाउँकोमा चोट लागेको छ।

सोही घटनाको विरोधमा शुक्रबार पनि चिकित्सकहरुले ट्रमा सेन्टरअगाडिको सडकमा प्रर्दशन गरेका थिए। त्यस क्रममा चिकित्सक र प्रहरीबीच भनाभन पनि भएको थियो ।

नजिकै निर्मला कुर्मीलाई न्यायको माग गर्दै डेढ महिनादेखि धर्नामा बसिरहेका छन् ।