काठमाडौँ– थारू समुदायले यस वर्षको माघी पर्वलाई काठमाडौं उपत्यका सहित देशव्यापी रुपमा आन्दोलनका रुपमा मनाउने भएको छ । 

थारू कल्याणकारिणी सभाको थारू राष्ट्रिय माघी महोत्सव मूल आयोजक समितिले बुधबार काठमाडौंमा पत्रकार सम्मेलन गर्दै थरुहट आन्दोलनकर्मीसंग सरकारले पटक पटक गरेको सहमति कार्यान्वयन हुन नसकेको र टीकापुर आन्दोलनका क्रममा थरुहट राजबन्दीहरूलाई सुनियोजित रुपमा झुटा मुद्दा लगाएको फसाइएको भन्दै यस वर्षको माघी पर्वलाई काठमाडौं उपत्यका सहित देशव्यापी रुपमा आन्दोलनका रुपमा मनाउने जनाएको हो ।

माघी पर्वका अवसरमा माघ १ गते काठमाडौंको टुँडिखेलमा विशेष कार्यक्रमको आयोजना गरिएको आयोजकले समितिले जनाएको छ । प्रधानमन्त्री पुष्पकमल दाहाल प्रचण्डले उद्घाटन गर्ने कार्यक्रममा विविध थारू सांस्कृतिक प्रस्तुती, थारू खानपिन, थारू सीप हस्तकला, पुस्तक प्रदर्शनी लगायतका प्रस्तुती हुने थारू कल्याणकारिणी सभाका सदस्य सचिव कानुलाल चौधरीले जानकारी दिए ।

त्यसअघि बिहान थारू संस्कृति, भेषभूषा बाजागाजासहित काठमाडौंको बसन्तपुरमा भेला भई झाँकी र्याली प्रदर्शन सहित रत्नपार्क परिक्रमा गर्ने कार्यक्रम रहेको आयोजक समितिले जनाएको छ ।